Tekstbase - kontekst
Du er på side 50 af 56 sider (Side 143 i forlægget)
Document Buttons
ergo vt perficiatur haec sanctificatio, addamus et alterum nempe orationem.
Cum de omnibus orare debemus, maxime opus est vt oremus pro praedicatoribus et ministerio verbi. Nam vt dicitur Lucae 6: Christus tota nocte orauit, quando mane ordinaturus erat 12 Apostolos. Item alibi dicit: Rogate dominum messis etc.
Orationi etiam addebant Apostoli et seniores Ecclesiae manuum impositionem cum ordinarent vel mitterent praedicatores, vt vides in Actis. Quem morem susceperunt postea Ecclesiae Christi ab apostolis, quemadmodum Paulus hortatur Episcopum dicens 1. Timoth. 5: Manus ne cito alicui imponas. De praedicatoribus et doctoribus ecclesiarum haec dicuntur non de Missariis. Olim hostiis manus imponebantur vt vides in lege Mosis. Scitote et hic nos deo offerre ad sacrum ministerium eos quibus manus imponimus.
Hoc ergo et nos ab Apostolis docti hic faciemus in nomine domini nostri Jesu Christi.
Hic ordinator cum presbyteris et senioribus imponit capiti ejus manus, et dicit aperte: Oremus, Pater noster etc. Et addit: Omnipotens aeterne Pater qui ita nos docuisti per vnigenitum filium tuum, vnicum magistrum nostrum: Messis est multa operarii vero pauci. Rogate ergo dominum messis vt mittat operarios in messem suam. Quae verba nos admonent, bonos operarios id est praedicatores et Ecclesiarum doctores, a tua gratia, seria et fideli praece petendos. Nos tuam immensam bonitatem precamur, vt clementer respicias hunc famulum tuum, quem ad Episcopale Ecclesiae officium eligimus, vt sit diligens in verbo tuo, ad praedicandum vnicam nostram salutem Jesum Christum, ad docendas conscientias, ad consulandum, ad monendum, et arguendum cum omni patientia et doctrina, ita vt sacrosanctum Euangelium perpetuo apud nos duret syncerum et sine fermento humanae doctrinae, et fructum ferat nobis omnibus aeternae salutis, per eundem Jesum Christum filium tuum dominum nostrum.
Respondetur ab omnibus: Amen.
Et statim canitur Danice: Nunc rogamus spiritum sanctum propter fidem rectam maxime etc.
Interim procumbit ordinator coram altari cum ordinato et aliis presbyteris et orant, dum cantatur primus cantici versus. Deinde surgunt, et vadit quisque in locum suum, vt postea cum aliis fidelibus accipiant sacram Christi communionem in hac domini coena.
Omnia praedicta dicantur et legantur Danice vt Ecclesia intelligat. Psalmi cantentur latine.
