Tekstbase - kontekst

voce et ministerio prophetarum confirmatorum, auspicatum iter ingredi, et de proposita materia aliquid verborum facere, Deo mentem et linguam <9> meam spiritu suo illuminante et gubernante, constitui. Interea ab illustrissimis principibus et Dominis totaque Ecclesia, subjectione et reverentia, qua par est, maxima contendo; ut me, primum sermone latino, mox Patrio, dicentem benigne audiant, atque me potius officii mei ratione, magisque obediendi quam dicendi studio, provinciam hanc suscepisse, sibi persuadeant.

Jnsignis est apud prophetam Danielem in interprætatione mirabilis istius somnii Regis Nebuchadnezaris imago et pictura, de grandi, sublimi et immensæ magnitudinis statua, ex quadruplici materia, pro diversitate partium corporis, auro, argento, ære et ferro lutea materia mixto, conflata: quam saxum sine manibus coelitus avulsum, eidemque statuæ illisum, impactumque contrivit et in nihilum redegit. Hanc imaginem etsi de Monarchiis et fatali quatuor summorum imperiorum mutatione ac translatione de gente in gentem, qua (ut in versu dicitur)

Assyriis rapuit Moedus Diademata, Moedum <10> Affligunt Persæ: Macedum Rex moenia Persis Stravit, et huic rursum frenum imposuere Quirites.

rite interpretari soleat: haud tamen obscure eadem ostenditur imagine, tantum fore summorum imperiorum et regnorum discrimen, facta ad priora comparatione, quanta est similitudo et discrepantia auri et ferri: lapsum illorum ex optimo felicissimoque statu in vilissimum et tristissimum secuturum, inque iis non tam externam potentiam, Majestatem et splendorem quam internam vim vigoremque paulatim deflorescere et evanescere: ut tandem secutura sint ante finem hujus seculi imperia, partim ferrea, hoc est cruenta et turbulenta; partim lutea, hoc est ignava et fragilia.