Tekstbase - kontekst
Du er på side 141 af 152 sider (Side I1r i forlægget)
Document Buttons
Agricolis ueterem liceat sperare salutem.
Secura dormiscat humo, certamqué quietem
Et gratos nulla captet formidine somnos.
Permeet hic terram, et uultu ferat omina miti
Phœbus, et haud nocuos immittat in arua calores.
Nec uentos acri propulsos turbine uerset
Tempestas, noceatqué gregi flatuué molestet
Surgentes calamos, nec ouilibus auferat agnos:
Sed prouisa Deo longæ stent cuncta saluti,
Et fœlix patrio lætetur Faustus in orbe.
(Ph.)
Vt fessis sopor est, et grata canentibus umbra,
Vtque oculis haurire diem, phœbiqué refusas
Prospectare faces cœlosqué uidere, uoluptas:
Sic mihi percellunt auidam tua carmina mentem.
Ac animis referunt, quæ maxima gaudia nostris.
Tuné etiam Musam, tuné accusaueris artem?
Aut tantam steriles saltus habitare Thaliam?
Fœlices equidem tali te pastor alumno
Agricolas: quamuis longos iam segnior annos
Dinumeres, meritis si præmia uersibus essent,
Et solita ueteres florerent laude coloni.
Eia age, ne calamos quantum sinit aura Deusqué
Submoueas labijs: sueta nec ab arte canendi
Fistula, quantumuis iam trita foramine, cesset.
