Tekstbase - kontekst
Du er på side 144 af 152 sider (Side I2v i forlægget)
Document Buttons
Perficiant, socijsqué dijs hæc sceptra teneri:
Et cœlo moderante pecusqué et pascua magno
Exundare bono, speratáque commoda duci.
Nec frustrata polo cadit expectatio: læuum
Hesterna modulans eadem cum luce rogarem,
Intonuit, toto fœcundus et æthere lapsus
Iuppiter optanti similis plausumqué ferenti
Maximus irriguo perfudit pascua rore:
Nec tamen aut steriles culmo deiecit auenas,
Aut sustentanti segetes decussit arista:
Pulcra serenato sed mox ut lumina uultu
Solueret, et lætos cohiberet coniugis imbres,
Hos equidem nebulis radios uentisqué fugatis
Immisit Phœbus, tantóque resplenduit igne
Quanto nostra uides hæc stringere gramina curru,
Et premere ardenti subiectas lampade terras.
En placidis etiam consistere fluctibus undas,
Molle nec excitis agitarier æquor arenis.
Vt tranquilla silent nunc omnia? et aspice quanto
Surgit agro, quantisqué tumet ditissima ripis
Scania, et Anchonæ consurgunt uertice turres,
Sublatiqué freto tendunt ad sidera montes.
En nostros uiridi frondere cacumine saltus
Ac propè completis agrorum semina spicis
