Tekstbase - kontekst
Du er på side 150 af 152 sider (Side I5v i forlægget)
Document Buttons
Excitet, aut seros apprendat fama Nepotes.
(Ph.)
Non satis est Melibœe pares, nisi forsan et illos?
Desine, turbatis animumqué et uincula soluit
Ira ferox, potin æthereis tua lumina stellis
Iungere, et hos studio complectier arduus ignes?
Et te posse scio. Satis est: ruit ignea Phœbi
Fax uicina freto, pontiqué propinquat in undas.
Da calamos, libet errantes conferre iuuencos,
Pascentesqué procul sonitu reuocare capellas.
Denique labentem potes hanc tibi fallere noctem
Mecum uix tenui Solem nox occulit umbra
Cum sublapsa diem celerat, lucemqué reducit.
Et Lycidas ueniet, Lycidæqué probatus Osiris
Istius antiqui facto studiosus aratro,
Et conferre iugo Tauros, et pascere doctus.
Mitia iam pridem sunt nobis poma, nouóque
Sinus lacte spumat: caseos dabit Oosa canistris,
Et distenta truces submittunt ubera uaccæ.
Cras socio Lycida, neque enim remorabor euntes
Sed sequar, ingressi claram ueniemus in urbem
Spectatum populiqué gradus turmasqué potentum,
Et Fausto grates duplicatáque uota feramus.
θεῳ δοξα.
