Tekstbase - kontekst
Du er på side 25 af 152 sider (Side A7r i forlægget)
Document Buttons
(Da.)
Certè equidem melius: Quid enim tu Mœri poëtas
Hos laudare soles, denso qui maxima uersu
Argumenta ferunt, quos tanti muneris autor
Cynthius, afflauit Parnasi è culmine montis?
Res etiam noster uariasqué bonasqué uidebit
In syluis passim, lato dum colle uagatus
Aequora conspiciet Scythico confinia luco:
Inspersas lustrabit aquas, fluuijsque natabit
Sæpius, et latis armentum saltibus abdet.
Arboreo discet Sobolinam è uertice pellem
Disijcere, intensos laxarequé funibus arcus:
Mustelæqué genus niueum, Martesqué sonoros,
Et sparsas corpus maculoso tegmine Lynces
Inuenit, ac sæuis ludentes cornibus Vros.
Denique non facile est, fuerit uox ferrea, centum
Seu fuerint linguæ, species memorare ferarum
Multiplices, numero quæ non constante uagantur
Saltibus, et toto Moscorum limite regnant.
Ergo ubi tam grandi peragrato Phædrius orbe
Huc redit, et multis naturæ partibus acri
Perspectis studio, populorum iura situsqué
Calleat, et mores solerti pectore narret:
Quale putas carmen nobis tum condere uatem
Posse tuum, quantoqué animos suspendere quæstu?
