Tekstbase - kontekst

certa hominibus solicitudo erga pauperes imprimatur. In die Johannis euangelistae de vocationibus, vt sua vnicuique vocatio commendetur, ne ea deserta requirat aliam.

Dominica Estomihi, Euangelium de baptismo Christi Math. 3 legatur, et hoc die toto ratio sacramenti baptismi explicetur.

Dominica Quasi modo geniti, occasione Euangelii Johannis vltimo, De clauibus ecclesiae praedicetur.

Bona quinta feria post palmarum Sacramentum corporis et sanguinis Christi enarretur. Et si qui communicare voluerint, juxta ritum dominicalem peragantur omnia. Tantum diligenter moneatur populus, ne ex sola consuetudine propter tempus communicet. Fiat etiam ad vesperam mentio et tractatio de lotione pedum et de agonia Christi in horto. Sexta feria post palmarum mane et a cantu puerorum, cum vulgare canticum in communi cecinerint omnes, ascendat praedicator et ex ordine totam passionem praelegat, conscriptam et collectam a Doct. Pomerano, ex quatuor Euangelistis vsque ad historiam resurrectionis. Ita incipiens: Hoc est supplicium domini nostri Jesu Christi, vt scriptum est a quattuor Euangelistis: Cum a coena gratias egisset Dominus noster Jesus Christus, iuit transtorrentem Cedron etc. Post ad dimidiam horam vsum passionis indicare poterit, et a prandio reliquos locos explicare. Quod si qui et hoc die communicare voluerint communicent, sed omittatur ea pars missae, quae ante praedicationem fieri solet, Et fiat initium dumtaxat ab exhortatione. Post quam statim sequitur Pater noster etc.

In die Johannis baptistae de ministerio externi verbi praedicetur contra anabaptistas, qui jactant illud dictum: Et erunt theodidacti, et omnes scholas vastant, tantum ne historia de sancto Joanne negligatur quae vna praedicatione non potest terminari, nempe de conceptione et natiuitate et praedicatione et decollatione ejus, cujus pars potest in alios dies reseruari. Et potest in die natiuitatis Johannis cantari sequentia de decollatione: Psallite regi etc.

In die omnium sanctorum de fide et imitatione diuorum praedicatur, vt intelligat ecclesia quomodo pie honorandi sint sancti, non inuocatione aut superstitione falsae religionis etc.

Dies angelorum communis gratiarum actio sit pro omnibus frugibus ipso anno percoeptis, et cantetur in gratiarum actionem protinus a concione, magna animi deuotione a tota ecclesia Te deum. Per totum autem diem tam mane quam a prandio de angelis concio habeatur, vt intelligant omnes quid per eorum ministerium nobis commodi accedat et vnde semper deo gratias agere debeamus.