Tekstbase - kontekst

Abecedarij legere ex puerilibus enchyridiis discant, quae Orationem dominicam, Symbolum apostolicum, et decem praecepta cum verbis baptismi et coenae Domini cum reliquis puerorum preculis continent. Et vesperi semper domum cum duobus vocabulis latinis mittantur.

Dictionarii qui enchyridion egressi aliquantulum legere norunt, Donatum et Catonem habeant, et hunc legere, illum ad verbum exponere discant, in iis diligenter exerceantur et semel emensos rursum ab integro incipiant, dum perfecte legere norint. Interim quotidie scribant et scripta ostendant, et sub vesperam itidem duobus vocabulis latinis domum mittantur, quae mane rursum ab iis, cum lectionem recensent requirantur.

Eorum qui jam perfecte legere queunt et grammatices praeceptiones discunt, esto libri eorum mane grammatica Philippi. Vbi in vsum grammatices Esopum exponant, et simul declinare et conjugare discant, etiam regulis declinationum et conjugationum adsignatis. A meridie fabulas Esopi, vesperi Paedologiam Moselani. In quibus si aliquantulum triti fuerint, addantur aliquot selectiora colloquia Erasmi. Interim diligenter exerceantur, vt semper latine loquantur, recte scribant, et construere ex arte discant. Et vesperi similiter sententia aliqua morali, quam mane in ludo exponant, domum ire permittantur.

Grammaticorum aliquousque profectorum, vt qui jam declinare, conjugare et construere nonnihil norint, esto.

Libri eorum, mane, Iterum Grammatica Philippi. Ibi rursum in vsum grammatices Terentius repetatur, constructiones exigantur, et regulae grammatices memoriter recitentur.

A meridie Terentius, quem etiam memoriae commendabunt, et cum in eo nonnihil promouerint, selectiores Plauti comediae, vesperi breuiores aliquot Ciceronis epistolae aut simile aliquid. Hi semper latine loquantur, quotidie aliquid ex Terentio recitent. Semel in quauis septimana epistolas scribant. Et vesperi domum duobus moralibus carminibus capessant.