Tekstbase - kontekst

Emerito alicui praedicatori, ministro Ecclesiae aut Scholae puerorum id est qui in suo officio doctus diu fideliterque seruiuit, nec potest amplius prae valetudine, cum pro eo rogati fuerimus, dabimus vnam praebendam proxime in Regno vacaturam, pro reliqua vita transigenda.

Pro Canonicis quae necessaria videntur statuemus in confirmatione Academiae Haffniensis. Volumus vero et mandamus, vt quemadmodum semper debuerunt, foueant honesto stipendio eruditum aliquem theologum in sua ciuitate, qui publice legat latine sacras literas pro Canonicis, pro Scholasticis aut doctis ciuibus, aut aliis adire volentibus. Hic theologus nonnunquam stato tempore praedicet, sed ita ne alia ordinaria praedicatio per hoc impediatur.

Et Canonici, qui alibi non agunt studii gratia, quotidie canant ex sacra scriptura et verbo Dei, quemadmodum Dilectus nobis Joannes Bugenhagius Pomeranus Doctor, suo consilio, quemadmodum vocat, ex verbo dei et ratione fidei Christianae prescripsit, quae jussimus in fine hujus nostrae ordinationis addi. Ea cum non grauent, vt illa Papistarum battologia, sed sancta sint et jucundissima verbi Dei exercitia, inuocationes Dei et gratiarum actiones, atque pene ludendo assuefaciant pios ad ipsam sacram scripturam, nihil est cur aliquis canonicus, qui a Canonica Scriptura nomen habet, ea recuset. Dominico quoque die et in festis, si adsunt communicaturi corpore et sanguine Christi, coenam Domini celebrent, vt ibi praescriptum est, nisi ipsorum ecclesia sit parochialis, qua de re antea dictum est in hac sacra ordinatione. Licebit eis in hoc suo otio viuere sed honesto et literario, donec ad officia vocati fuerint. Qui non continent ducant vxores secundum dei ordinationem, nihil morati doctrinas daemoniorum. Venerandum conjugium (ait ille) sit omnibus et thorus immaculatus. Scortatores autem et adulteros judicabit deus. Conuersamini sine auaritia, contenti praesentibus id est iis quae adsunt.

Quando autem propter doctrinam vocantur quidam ex eis, si ita res