Tekstbase - kontekst
Du er på side 18 af 152 sider (Side A3v i forlægget)
Document Buttons
Is recreata fouet solus tua pectora Damon,
Versibus ut scriptum imparibus tibi Cæsaris olim
Pandit opus, latijsqué refert quæ gesta Monarchis.
Denique quòd tali sit tempore lectus, et illis
Saltibus ignotis errabit, aquasqué lacusqué
Transiet, et dubiæ uitam committet eremo.
"Cui lætis etenim superata est fructibus æstas,
"Ille foris minimè facili tolerare rigorem
"Hybernum potis ingenio, sed dura perosus
"fata gemit, totoqué miser fugit aspera sensu:
Et merito. Neque enim Myrmicis dicta coloni
Ignorasse potes, qui nostræ semina uitæ
Dixerat æthereo cuidam finiqué bonoqué
Condita, nec miseris producta doloribus esse.
Nunc uerò aduersis plerumque euentibus hæret
Hoc genus, et dura subit alta pericula sorte.
Et mihi, nescio quo ueniat fatoué Deoué
Quos natura bonos finxit, uirtusque sub auras,
Extulit æthereas, nomenqué sacrauit olympo,
Aut hos morte rapi primos, aut cladibus actos
Comprendi, et varijs opplere laboribus æuum.
Et certè nostris longè placidissimus aruis
Phædrius hic uixit: sæuo quem numine duci,
Et querimur meritó, et lacrymis comitamur euntem.
