Tekstbase - kontekst
Du er på side 5 af 56 sider (Side 98 i forlægget)
Document Buttons
Primum, doctrinam: Vt boni praedicatores eligantur, qui euangelium syncere praedicent, Sacramenta legitime administrant, et Catechismum rite enarrent.
Secundum, Scholas: Vt idonei ludimagistri in vrbibus constituantur et oppidis, qui juuentutem certa vbique ratione instituant.
Tertium, Ceremonias: Vt vtiles et vniformes ritus per omnes ecclesias ordinentur, ne dispares ritus infirmos offendant.
Quartum, Commune aerarium pro ministris ecclesiae et pauperibus: Vt sit vnde publicis ecclesiae ministris suus sumptus constet et pauperibus subueniatur.
Quintum, Superattendentes cum suis praepositis: Vt sint per quos ministri in officio retineantur, et qui prouideant, vt omnia circumquaque rite gerantur.
Sextum, Libros: Vt boni parochi habeant vnde synceram pietatem hauriant solidius, Ne malis libris (quorum hodie nimis magna est copia et quotidie fit major) inficiantur.
Doctrina vero tria potissimum continet. Primum: Integram Euangelii praedicationem, quae poenitentiam, fidem et ejus fructus bona inquam opera juxta vrget.
Secundum: legitimam sacramentorum ordinationem quae poenitentiam requirunt, fidem confirmant, et fructuum fidei nos commonefaciunt.
