Tekstbase - kontekst

Tertium: Simplicem catechismi explicationem, qua ratio verae poenitentiae demonstratur, peccata et bona opera indicantur, et quae vera fides sit, et qui eam consequamur, ostenditur.

Porro integra doctrina euangelii omnibus vbique pura certa et vniformis sit, vrgeaturque in primis syncere et sedulo locus justificationis, vt intelligant omnes quid fides sit et efficiat, quomodo eam consequamur et homines justificentur, atque adeo quid sentiendum, et quomodo praedicatoribus praedicandum sit.

Hic oportet, vt loci quidam praecipui constituantur, ad quos inter concionandum tanquam ad fontes recurratur, ne vaga et suis legibus soluta huc illuc vacillet oratio. Et sunt qui sequuntur: De lege et timore dei. De euangelio et fiducia in deum. De poenitentia. De Cruce. De Oratione. De bonis operibus. De libero arbitrio. De libertate christiana. De praedestinatione. De traditionibus. De Magistratu. De conjugio. De Sanctis. De Jejuniis. De Imaginibus et similibus, ne imprudenti concione simplicium animos subuertant praedicatores, et ab euangelio deterreant. Quos etiam hic volumus admonitos, vt cauti sint et in primis sibi prospiciant, quando de praedestinatione, de libertate christiana, aut alijs articulis fidei loquuntur, qui captum humanum longe lateque excedunt in quibus etiam caro facile scandalizatur. Caueant quoque ne de rebus obscuris disserant et tractent, nisi vbi vrgeat ineuitabilis necessitas. Quae omnia commodissime (gratia dei) facient si frequentes et seduli fuerint in precibus et oratione ad deum et lectione bonorum auctorum, et de peccatis et remissione peccatorum diligenter docuerint.

Legitima vero sacramentorum administratio et simplex catechismi explicatio est, qua vniformiter illa distribuuntur, hic explicatur, quae vt vbique omnibus conformia sint volumus et mandamus.