Tekstbase - kontekst

cum gloria patri etc. et psalmo Beati immaculati finito, semper ejus loco psalmum Quicunque vult saluus esse canant, et postea Antiphonam repetitam absoluant, antiphona percantata, cum non praedicatur loco capituli puer ex nouo testamente lectionem latinam incipiat cum hoc initio: lectio sancti Euangelii Matthaei capite primo. Et in fine vt prophetiae finiuntur. Hoc (si placet) etiam secundus faciat, et tertius itidem, si ita visum erit. Sed hic vulgari sermone suam lectionem legat, quam priores legerunt latine.

Post lectionem vulgare canticum incipiant, vel Benedictus cum antiphona, si placet, Deinde pueri ad genua procidentes dicant kyrie eleyson, Christe eleyson, kyrie eleyson, et legant pater noster etc.

Postea vnus ex ministris verbi dicat: Ostende nobis domine misericordiam tuam, et respondetur ei. Post: dominus vobiscum cum colecta, Vltimo pueri: Benedicamus domino.

Et hic si fuerint qui ob certas causas communicare voluerint, communicent, vel a concione si praedicabitur. Sed sit euidens necessitas, ne ex contemptu publicae coenae fiat.

Iisdem operosis diebus a secunda vel quarta aeramentis sonantibus ad eundem modum tres psalmi (vel pauciores) vespertini, ad antiphonae tonum, cantabuntur excaepto octonario.

Lectiones item pueri pro capitulo ex veteri testamento cum praedicto initio et fine, Ita: lectio libri Geneseos capite primo etc. Canant post Hymnum ferialem, Hinc canticum vulgare, vel Magnificat cum antiphona, post finietur, vt mane.

In vesperis vigiliarum et feriarum ad eundem modum peragantur omnia. Sed a lectionibus responsorium cantetur cum gloria patri etc. Post hymnus, ab eo cum antiphona Magnificat, demum: Nunc dimittis, sine tono. Et post finietur vt supra.

In matutinis dominicarum et festorum, ante praedicationem, tres psalmi vel minus et duo octonarii cum antiphona canentur. Post quos legant media voce pueri sine tono catechismum, semper paedagogo principium praecinente, Ita:

Primo paedagogus: Haec sunt praecepta domini dei nostri. Post pueri tractim et vicissim reliqua: Ego sum dominus deus tuus. Non habebis deos etc.